sochtaa hun ki muhabbat se kinaaraa kart luun
dil ko begaanaa-e-taraGiib-o-tamannaa kar luun
sochtaa huun ki muhabbat hai junuun-e-rusvaa
chand bekaar-se behudaa Khayalon kaa hujuum
ek aazaad ko paaband banaane kii havas
ek begaane ko apanaane kii sai-e-mauhuum
sochtaa hun ki muhabbat hai suruur-e-mastii
is kii tanviir men raushan hai fazaa-e-hastii
sochtaa huun ki muhabbat hai bashar kii fitarat
is kaa mit jaanaa, mitaa denaa bahut mushkil hai
sochtaa hun ki muhabbat se hai taabindaa hayaat
aap ye shamaa bujhaa denaa bahut mushkil hai
sochtaa hun ki muhabbat pe kadii sharten hain
ik tamaddun men masarrat pe badii sharten han
sochtaa hun ki muhabbat hai ik afasurdaa sii laash
chaadar-e-izzat-o-naamuus men kafanaa_ii huii
daur-e-sarmaayaa kii raundii huii rusavaa hastii
daragah-e-mazahab-o-ikhlaaq se thukaraaii huii
sochtaa hun ki bashar aur muhabbat kaa junun
aisii bosiidaa tamaddun se hai ik kaar-e-zabuun
sochtaa huun ki muhabbat na bachegii zindaa
pesh-az-vaqt kii sad jaaye ye galatii huii laash
yahii behatar hai ki begaanaa-e-ulfat hokar
apane siine men karun jazb-e-nafarat kii talaash
aur saudaa-e-muhabbat se kinaaraa kar luun
dil ko begaanaa-e-taraGiib-o-tamannaa kar luun
