aaiina kyun na duun ke tamasha kahen jise
aisaa kahaan se laauun ke tujhsa kahen jise
hasrat ne laa rakhaa terii bazm-e-Khayaal men
guladastaa-e-nigaah suvedaa kahen jise
phunka hai kisne gosh-e-muhabbat men aye Khuda
afsuun-e-intazaar tamanna kahen jise
sar par hujuum-e-dard-e-gariibii se daliye
vo ek musht-e-Khaak ke saharaa kahen jise
hai chashm-e-tar men hasarat-e-diidaar se nihaan
shauq-e-inaan gusekhtaa dariyaa kahen jise
darakaar hai shiguftan-e-gul haaye aish ko
subah-e-bahaar pa.nbaa-e-miinaa kahen jise
"Ghalib" buraa na maan jo vaaiz buraa kahe
aisaa bhii koii hai ke sab achchhaa kahen jise
