aao ki koii Khvaab bunen kal ke vaaste
varanaa ye raat aaj ke sangiin daur kii
Das legii jaan-o-dil ko kuchh aise ki jaan-o-dil
taa-umr phir na koii hasiin Khvaab bun saken
go ham se bhaagatii rahii ye tez-gaam umr
Khvaabon ke aasare pe kaTii hai tamaam umr
zulfon ke Khvaab, honthon ke Khvaab,aur badan ke Khvaab
meraaj-e-fan ke Khvaab,kamaal-e-suKhan ke Khvaab
tahaziib-e-zindagii ke, faroG-e-vatan ke Khvaab
zindaan ke Khvaab, kuuchaa-e-daar-o-rasan ke Khvaab
ye Khvaab hi to apani javaanii ke paas the
ye Khvaab hi to apane amal ke asaas the
ye Khvaab mar gaye hain to be-rang hai hayaat
yun hai ki jaise dast-e-tah-e-sang hai hayaat
aao ki ko_ii Khvaab bunen kal ke vaaste
varanaa ye raat aaj ke sangiin daur kii
Das legii jaan-o-dil ko kuchh aise ki jaan-o-dil
taa-umr phir na koii hasiin Khvaab bun saken
