Thursday, April 29, 2010

Ek Sunehra Daur- Nasir Kazmi


dil dhaDakane kaa sabab yaad aayaa
vo terii yaad thii ab yaad aayaa
 
aaj mushkil thaa sambhalanaa ai dost
tuu musiibat men ajab yaad aayaa
 
din guzaaraa thaa baDii mushkil se
phir teraa vaadaa-e-shab yaad aayaa
 
teraa bhuulaa huaa paimaan-e-vafaa
mar rahenge agar ab yaad aayaa
 
phir ka_ii log nazar se guzare
phir ko_ii shahar-e-tarab yaad aayaa
 
haal-e-dil ham bhii sunaate lekin
jab vo ruKhsat hue tab yaad aayaa
 
baiTh kar saayaa-e-gul men 'Nasir'
ham bahut roye vo jab yaad aayaa
 
 
tere Khayaal se lau de uThii hai tanhaaii
shab-e-firaaq hai yaa terii jalvaa-aaraaii
 
tuu kis Khayaal men hai ai manzilon ke shaadaaii
unhen bhii dekh jinhen raaste men niind aaii
 
pukaar ai jaras-e-kaaravaan-e-subah-e-tarab
bhaTak rahe hain aNdheron men tere saudaaii
 
rah-e-hayaat men kuchh marhale to dekh liye
ye aur baat terii aarazuu na raas aaii
 
ye saanihaa bhii muhabbat men baarahaa guzaraa
ki us ne haal bhii puuchhaa to aaNkh bhar aaii
 
phir us kii yaad men dil beqaraar hai 'Nasir'
bichhaD ke jis se hu_ii shahar shahar rusavaaii
 
 
vo dil navaaz hai nazar shanaas nahiin
meraa ilaaj mere chaaraagar ke paas nahiin
 
taDap rahe hain zabaaN par kaii savaal magar
mere liye koii shayaan-e-iltamaas nahiin
 
tere ujaalon men bhii dil kaaNp kaaNp uThataa hai
mere mizaaj ko aasuudagii bhii raas nahiiN
 
kabhii kabhii jo tere qurb me.n guzare the
ab un dinon kaa tasavvur bhii mere paas nahiin
 
guzar rahe hain ajab marhalon se diidaa-o-dil
sahar kii aas to hai zindagii kii aas nahiin
 
mujhe ye Dar hai ki terii aarazuu na miT jaaye
bahut dinon se tabiiyat merii udaas nahiin
 
 
 
niiyat-e-shauq bhar na jaaye kahiin
tuu bhii dil se utar na jaaye kahiin
 
aaj dekhaa hai tujhe der ke baad
aaj kaa din guzar na jaaye kahiin
 
na milaa kar udaas logon se
husn teraa bikhar na jaaye kahiin
 
aarazuu hai ke tuu yahaaN aaye
aur phir umr bhar na jaaye kahiin
 
jii jalaataa huuN aur ye sochataa huuN
raayegaaN ye hunar na jaaye kahiin
 
aao kuchh der ro hii len 'Nasir'
phir ye dariyaa utar na jaaye kahiin
 
 
dayaar-e-dil kii raat men chiraaG saa jalaa gayaa
milaa nahiin to kyaa huaa vo shaql to dikhaa gayaa
 
judaa_ion ke zaKhm dard-e-zindagii ne bhar diye
tujhe bhi niind aa gaii mujhe bhii sabr aa gayaa
 
ye subah kii safediyaaN ye dopahar kii zardiyaaN
ab aa_iine men deKhataa huuN main kahaaN chalaa gayaa
 
pukaratii hain fursaten kahaaN gaii vo sohabaten
zamiin nigal gaii unhen yaa aasamaan khaa gayaa
 
vo dostii to Khair ab nasiib-e-dushmanaaN huii
vo chhoTii chhoTii ranjishon kaa lutf bhii chalaa gayaa
 
ye kis Khushii kii ret par Gamon ko niind aa gaii
vo lahar kis taraf gaii ye main kahaaN samaa gayaa
 
gaye dinon kii laash par paDe rahoge kab talak
uTho amal_kashon uTho ki aafataab sar pe aa gayaa
 

------------------------------------------------------------------------------------------------------------------------------------------------

girifta-dil hain bahut aj tere diwane
Khuda kare koi tere siwa na pahchane

miti miti si ummiden thak thak se khayal
bujhe bujhe se nigahon main gam k afsane

hazar shukr k ham ne zuban se kuch na kaha
ye aur bat k pucha na ahal-e-duniya ne

baqadr-e-tashnalabi pursish-e-wafa na hui
chalak k rah gaye teri nazar k paimane

khayal a gaya mayus rahguzaron ka
palat k a gaye manzil se tere diwane

kahan hai tu k tere intazar main ai dost
tamam rat sulagate rahe dil k wirane

ummid-e-pursish-e-gam kis se kijiye 'Nasir'
jo mere dil pe guzarti hai koi kya jane


kuchh to ehasaas-e-ziyaaN thaa pahale
dil kaa ye haal kahaaN thaa pahale

ab to manzil bhii hai Khud garm-e-safar
har qadam sang-e-nishaa.N thaa pahale

safar-e-shauq ke far_sang na puuchh
vaqt beqaid-e-makaaN thaa pahale

ye alag baat ki Gam raas hai ab
is men andeshaa-e-jaaN thaa pahale

yuuN na ghabaraaye huye phirate the
dil ajab kunj-e-amaaN thaa pahale

ab bhii tuu paas nahiin hai lekin
is qadar duur kahaaN thaa pahale

Dere Daale hain bagolon ne jahaaN
us taraf chashm-e-ravaa.N thaa pahale

ab vo dariyaa na bastii na vo log
kyaa Khabar kaun kahaaN thaa pahale

har Kharaabaa ye sadaa detaa hai
main bhii aabaad makaaN thaa pahale

kyaa se kyaa ho gaii duniyaa pyaare
tuu vahiin par hai jahaaN thaa pahale

ham ne aabaad kiyaa mulk-e-suKhan
kaisaa sun_saan samaaN thaa pahale

ham ne baKhshii hai Khamoshii ko zubaaN
dard majabuur-e-fuGaaN thaa pahale

ham ne roshan kiyaa maamuur-e-Gam
varnaa har simt dhuaaN thaa pahale

Gam ne phir dil ko jagaayaa 'Nasir'
Khaanaa_barbaad kahaa.N thaa pahale

------------------------------------------------------------------------------------------------

be minnat-e-Khizr-e-raah rahnaa
manzuur hameN tabaah rahnaa

yaaroN ko nasiib sar-faraazii
mujhko terii gard-e-raah rahnaa

dil aik ajiib ghar hai pyaare
is ghar meN bhii gaah-gaah rahnaa

gar yuNhii rahii diloN kii ranzisheN
mushkil hai baham nibaah rahnaa

bhar aayegii aaNkh bhii kisii din
Khaalii nahiiN sarf-e-aah rahnaa

“Nasir” ye vafaa nahiiN junuuN hai
apnaa bhii na Khair-Khvaah rahnaa !

dil meN ek lehar sii uThii hai abhii
ko’ii taazaa havaa chalii hai abhii

shor barpaa hai Khaanaa-e-dil meN
ko’ii diivaar sii girii hai abhii

kuchh to naazuk mizaaj haiN ham bhii
aur ye choT bhii nayii hai abhii

bharii duniyaa meN jii nahiiN lagtaa
jaane kis chiiz kii kamii hai abhii

tuu shariik-e-suKhan nahiiN hai to kyaa
ham-suKhan terii Khaamoshii hai abhii

yaad ke be-nishaaN jaziiroN se
terii aavaaz aa rahii hai abhii

shahr ke be-chiraaGh galiiyoN meN
zindagii tujh ko DhuuNDhtii hai abhii

so gaye log us havelii ke
ek khiRkii magar khulii hai abhii

tum to yaaro abhii se uTh baiThe
shahr meN raat jaagtii hai abhii

vaqt achchhaa bhii aayegaa ‘Nasir’
Gham na kar zindagii paRii hai abhii

fikr-e-taameer-e-aashiaN bhi hai
khauf-e-be mahri-e-khizaaN bhi hai

khaaq bhi ud rahi hai rastoN mein
aamad-e-subh-e-samaaN bhi hai

rang bhi ud raha hai phooloN ka
ghuncha ghuncha sard-fasaaN bhi hai

oas bhi hai kahiiN kahiiN larzaaN
bazm-e-anjuman dhuaaN dhuaaN bhi hai

kuch to mausam bhi hai khyaal angez
kuch tabiyat miree ravaan bhi hai

kuch tiraa husn bhi hai hosh-rubaa
kuch miree shokhi-e-butaaN bhi hai

har nafs shauq bhi hai manzil kaa
har qadam yaad-e-raftugaaN bhi hai

wajh-e-taskeeN bhi hai khyaal uska
had se badh jaaye to giraaN bhi hai

zindagi jis ke dam se hai Nasir
yaad uski azaab-e-jaaN bhi hai

jab raat gaye tiri yaad aayii, sau tareh se jii ko behlaayaa
kabhii apne hii dil se baateN kiiN, kabhii terii yaad ko samjhaayaa

yuuNhii vaqt gaNvaaya motii saa, yuuNhii umr gaNvaayii sone sii,
sach kehte ho tum bhii ham suKhanoN, is ishq meiN ham ne kyaa paayaa?

jab pehl-e-pehl tujhe dekhaa thaa, dil kitne zor se dhaRkaa thaa
vo lehr na dil meiN phir jaagii, voh vaqt na lauT ke phir aayaa

phir aaj tire darvaaze par, baRii der ke baad gayaa thaa magar,
ek baat achaanak yaad aayii, maiN baahar hii se lauT aaya

jurm-e-inkaar kii sazaa hii de
mere haq meN bhii kuch sunaa hii de

shauq meN hameN nahiiN ziyaadaa talab
jo teraa naaz-e-kam-nigaahii de

tuu ne taaroN se shab kii maaNg bharii
mujh ko ek ashq subh-gaahii (?) de

tuu ne banjar zamiiN ko phuul diye
mujh ko ek zakhm dil-kushaa hii de

bastioN ko diye haiN tuu ne chiraaG
dasht-e-dil ko bhii ko’ii raahii de

umr bhar kii navaa-garii kaa silaa
ai Khudaa! ko’ii ham-navaa hii de

zard-rau hain warq KhyaaloN ke
ai shab-e-hijr ! kuch siyaahii de

gar majaal-e-sukhan nahiiN “Nasir”
lab-e-khaamosh se gavaahii de

karta use beqarar kuch der
hota agar ikhtiyar kuch der

kya royein fareb-e-aasmaan ko
apna nahin aitbaar kuch der

aankhoN mein kati pahaar si raat
so ja dil-e-beqaraar kuch der

ai shehar-e-tarab ko jaane waloN
karna mira intizaar kuch der

bekaifi-e-roz-o-shab musalsal
sarmasti-e-intizaar kuch der

takleef-e-gham-e-firaaq dayem
taqreeb-e-wisaal-e-yaar kuch der

ye guncha-o-gul hain sab musafir
hai kaafila-e-bahaar kuch der

dunyaa to sada rahegi Nasir
ham log hain yaadgaar kuch der

kaun is raah se guzartaa hai
dil yuuN hii intizaar kartaa hai

dekh kar bhii na dekhne vaale
dil tujhe dekh dekh Dartaa hai

shah’r-e-gul meN gayii hai saarii raat
dekhiye din kahaaN guzartaa hai

dhyaan kii siiRhiyoN pe picchle pahar
ko’ii chupke se paaNv dhartaa hai

dil to meraa udaas hai “Nasir”
shah’r kyuuN saaeN saaeN kartaa hai

naaz-e-be-gaangii meN kyaa kuch thaa
husn kii saadgii meN kyaa kuch thaa

laakh raaheN thiiN, laakh jalve the
ahd-e-aavaargii meN kyaa kuch thaa

aaNkh khulte hii chhup gayii har shai
aalam-e-beKhudii meN kyaa kuch thaa

yaad haiN marhale muhabbat ke
haaye ! us be-kalii meN kyaa kuch thaa

kitne biite dinoN kii yaad aayii
aaj terii kamii meN kyaa kuch thaa

kitne maanuus log yaad aaye
subh kii chaaNdnii meN kyaa kuch thaa

raat bhar ham na so sake “Nasir”
parda-e-Khaamshii meN kyaa kuch thaa

O ! mere masruuf Khudaa
apnii duniyaa dekh zaraa

itnii Khalqat ke hote
shah’roN meN hai sannaaTaa

jhoNpRii vaaloN ki taqdiir
bujhaa bujhaa saa aik diyaa

Khaak uRaate haiN din raat
miiloN phail gaye sehraa

zaaGh-o-zaghan ki chiiKhoN se
suunaa jangal guuNj uThaa

suuraj sar par aa pahuNchaa
garmii hai yaa roz-e-jazaa

pyaasii dhartii jaltii hai
suukh gaye bahte daryaa

fasleN jal kar raakh hu’iiN
nagrii nagrii kaal paRaa

O ! mere masruuf Khudaa
apnii duniyaa dekh zaraa

rang barsaat ne bhare kuch to
zakhm dil ke hue hare kuch to

fursat-e-bekhudi ganeemat hai
gardishein ho gayiiN pare kuch to

kitne shoreedah sar the parwaane
shaam hote hi jal mare kuch to

aisa milna nahin tera milna
dil magar justujoo kare kuch to

aao ! Nasir koi ghazal chherein
jee bahal jayega are kuch to

tanhaa ishq ke khwaab na bun
kabhi hamari baat bhi sun

thora gham bhi uthaa pyaare
phool chune hain khaar bhi chun

sukh ki neendein sone wale
marhoomi ke raag bhi sun

Qitaa

tanhaii mein teri yaad
jaise ek sureeli dhun
jaise chaand ki thandi lau
jaise kirnon ki kun mun
jaise jal-parioN ka taaj
jaise paayal ki chhun chuun

tere aane kaa dhokaa saa rahaa hai
diyaa saa raat bhar jaltaa rahaa hai

ajab hai raat se aaNkhoN kaa aalam,
ye dariyaa raat bhar chaRhtaa rahaa hai

sunaa hai raat bhar barsa hai baadal,
magar vo shah’r jo pyaasaa rahaa hai?

vo ko’ii dost thaa achche dinoN kaa,
jo pichhlii raat se yaad aa rahaa hai

kise DhuuNDoge in galiyoN meN “Nasir”?
chalo ab ghar chaleN, din jaa raha hai

terii zulfoN ke bikharne kaa sabab hai ko’ii
aaNkh kahtii hai tere dil meN talab hai ko’ii

aaNch aatii hai tere jism kii uryaanii se
pairahan hai ke sulagtii hu’ii shab hai ko’ii

hosh uRaane lagiiN phir chaaNd kii ThanDii kirneN
terii mastii meN huuN yaa Khvaab-e-tarab hai ko’ii

giit buntii hai tere shah’r kii bharpuur havaa
ajnabii maiN hii nahiiN tuu bhii ajab hai ko’ii

liye jaatii haiN kis dhyaan kii lahreN “Nasir”
duur tak silsilaa-e-taak-e-tarab hai ko’ii

yaas meN jab kabhii aaNsuu niklaa
ek nayii aas kaa pahluu niklaa

le uRii sabza-e-Khuudruu ki mahek
phir terii yaad kaa pahluu niklaa

miiThii bolii meN papiihe bole
gungunaataa hu’aa jab tuu niklaa

aayiiN saavan kii andherii raateN
kahiiN taaraa, kahiiN jugnuu niklaa

(saavan : rainy season; taaraa : star)

naye mazmuun sujhaatii hai sabaa
kyaa idhar se vo mushk-buu niklaa

paaNv chhilne lagii jaltii hu’ii ret
dasht se jab ko’ii aahuu niklaa

ka’ii din raat safar meN guzre
aaj to chaaNd lab-e-juu niklaa

taaq-e-maiKhaanaa meN chaahii thii amaaN
vo bhii teraa Kham-e-abruu niklaa

ahl-e-dil sair-e-chaman se bhii gaye
aks-e-gul saayaa-e-gesuu niklaa

vaaqiyaa ye hai ke badnaam hu’e
baat itnii thii ke aaNsuu niklaa

Pathar bana diya mujhe rone nahi diya
Daman bhi tere gham ne bhigone nahi diya

Tanhaiyan tumhara pata poochti rahin
Shab bhar tumhari yaad ne sone nahi diya

Aankhon mein aa ke beith gai ashkon ki lehar
Palkon pe koi khwab pirone nahi diya

Dil ko tumhare naam ke aansoo aziz the
Dunia ka koi dard samone nahi diya

Nasir yun us ki yaad chali haath thaam ke
Meile mein is jahan ke khone nahi diya

zabaaN suKhan ko suKhan baaNkapan ko tarasegaa
suKhan_kadaa merii tarz-e-suKhan ko tarasegaa

naye pyaale sahii tere daur men saaqii
ye daur merii sharaab-e-kohan ko tarasegaa

mujhe to Khair vatan chhoD ke aman na milii
vatan bhii mujh se Gariib-ul-vatan ko tarasegaa

unhiin ke dam se farozaaN hain millaton ke charaaG
zamaanaa sohabat-e-arabaab-e-fan ko tarasegaa

badal sako to badal do ye baaG_baaN varanaa
ye baaG saayaa-e-sard-o-samaaN ko tarasegaa

havaa-e-zulm yahii hai to dekhanaa ek din
zamiin paanii ko suuraj kiran ko tarasegaa