khudaariyon ke Khuun ko arzaan na kar sake
ham apane jauharon ko numaayaan na kar sake
Ho kar Kharaab-e-may tere Gam to bhulaa diye
lekin Gam-e-hayaat kaa daramaan na kar sake
Tuutaa talism-e-ahad-e-mohabbat kuchh is tarah
phir aarzuu kii shamaa furozaan na kar sake
har shaye qariib aa ke kashish apnii kho gaii
vo bhii ilaaj-e-shauq-e-gurezaan na kar sake
kis darjaa dil-shikan the mohabbat ke haadase
ham zindagii men phir koii armaan na kar sake
maayuusiiyon ne chhiin liye dil ke val-vale
vo bhii nishaat-e-ruuh kaa saamaan na kar sake
