Some pearls From Jaganath Azad"s Ocean of Thoughts

Jaganath Azad

-------------------

jis tarah daaman-e-mashriq men sahar hotii hai

zarre zarre ko tajallii kii Khabar hotii hai

aur jab nuur kaa sailaab guzar jaataa hai

raat bhar ek andhere men basar hotii hai

kuchh isii tarah se hai yaad ke tum aaye the 

jaise gulashan men dabe paaon bahaar aatii hai

pattii pattii ke liye leke nikhaar aatii hai

aur phir vaqt vo aataa hai ke har mauj-e-sabaa

apane daaman men liye gard-o-Gubaar aatii hai

kuchh isii tarah se hai yaad ke tum aaye the 

jis tarah mahv-e-safar ho ko_ii viiraane men

aur raste men kahiin ko_ii KhiyaabaaN aa jaaye

chand lamhon men KhiyaabaaN ke guzar jaane par

saamane phir vohii duniyaa-e-biyaabaaN aa jaaye

kuchh isii tarah se hai yaad ke tum aaye the 

manzil-e-jaanaaN ko jab ye dil ravaaN thaa dosto 

tum ko main kaise bataa_uuN kyaa samaaN thaa dosto 

har gumaaN pahane hue thaa ek malbuus-e-yaqiin 

har yaqiin jaaN daadaa-e-husn-e-gumaaN thaa dosto 

dil ki har dha.Dakan makaan-o-laamakaaN par thii muhiit 

har nafas raaz-e-do_aalam kaa nishaaN thaa dosto 

kyaa Khabar kis justajuu men is qadar aavaaraa thaa 

dil ke jo ganjiinaa-e-sarr-e-nihaaN thaa dosto 

DhuuNDhane par bhii na milataa thaa mujhe apanaa vujuud 

main talaash-e-dost men yuuN benishaaN thaa dosto 

markad-e-iqbal par haazir thii jab dil ki taDap 

zindagii kaa ek pardaa darmiyaaN thaa dosto 

qarb ne paidaa kiyaa thaa Khud hii duurii kaa samaaN 

faasalaa varna haa_il kahaaN thaa dosto

beKhudii men jab mere honTon ne chuumaa qabr ko 

mere siina se gadaa-e-fursiyaaN thaa dosto 

ruu-ba-ruu-e-jalvaa-e-markad vujuud-e-kam ayaar 

zar-e-naaqis sharmasaar-e-imtehaaN thaa dosto 

partav-e-dil men nihaaN thii tah-bateh ye Khaamoshii 

ishq kaa vo bhii ik izhaar-e-bayaaN thaa dosto 

jalvaagaah-e-dost kaa aalam kahuuN main tum se kyaa

jalvaa hi jalvaa vahaaN thaa main kahaaN thaa dosto

sajdagaah-e-Khurshiyaa.N thaa yaaN na jaane kyaa thaa vo 

jo merii nazaron ke aage aastaaN thaa dosto 

dil ne har lamhe ko dekhaa ik niraale rang me.n 

lamhaa lamhaa daastaa.N dar daastaaN thaa dosto 

jis ke sher-o-naGmagii par vusat-e-aalam thii tang 

har subah ko vo dopahre bekaraaN thaa dosto 

so rahaa thaa Khaak ke niiche jahaan-e-zindagii 

raaz-e-hastii merii nazaron par ayaaN thaa dosto 

kaash tum bhii merii palkon kaa nazaaraa dekhate 

ye nazaaraa kahkashaaN dar kahkashaaN thaa dosto 

mumkin nahiin ki bazm-e-tarab phir sajaa sakuuN 

ab ye bhii hai bahut ki tumhen yaad aa sakuuN 

ye kyaa tilism hai ki terii jalvaagaah se 

nazadiik aa sakuuN na kahiin duur jaa sakuuN 

zauq-e-nigaah aur bahaaro.n ke darmiyaaN 

parde gire hai.n vo ki na jin ko uThaa sakuuN 

kis tarah kar sako bahaaron ko mutama_in 

ahal-e-chaman jo main bhii chaman men na saakuuN 

terii hasiin fizaa me.n mere ai naye vatan 

aisaa bhii hai ko_ii jise apanaa banaa sakuuN 

'Azad' saaz-e-dil pe hain raqsaaN ke zam-zame 

Khud sun sakuuN magar na kisii ko sunaa sakuuN 

terii bazm-e-tarab me.n soz-e-pinhaaN leke aayaa huuN 

chaman men yaad-e-ayyaam-e-bahaaraaN leke aayaa huuN 

terii mahafil se jo aramaan-o-hasarat leke nikalaa thaa 

vo hasarat leke aayaa huuN vo aramaaN leke aayaa huuN 

tumhaare vaaste ai dosto mai.n aur kyaa laataa 

vatan kii subah aur shaam-e-GariibaaN leke aayaa huuN 

main apane ghar men aayaa huuN magar andaaz to dekho 

ke apane aap ko maanind-e-mahamaaN leke aayaa huuN 

kaamaraan yuuN thaa meraa baKht-e-javaaN kal raat ko

jhuk rahaa thaa mere dar pe aasamaaN kal raat ko 

husn jab thaa ishq ke ghar mahamaaN kal raat ko

uTh chukaa thaa har hijaab-e-daramiyaaN kal raat ko 

kaash ban jaatii hayaat-e-jaavidaaN kal raat ko

kis qadar mahabuub thii umr-e-ravaaN kal raat ko 

dil agar tanhaa meraa tiir-o-kamaaN kii zad pe thaa

dil kii zad par bhii rahe tiir-o-kamaaN kal raat ko 

ban rahii thii halqaa merii ziist ke girdaab kaa

kuchh sunaharii kuchh rupahalii chuuriyaaN kal raat ko 

ruk ga_iin thii yuuN zamiin-o-aasamaaN kii gardishen 

niim-shab par shaam hii kaa thaa gumaaN kal raat ko 

kyaa Khabar kyon husn kii farmaa_ishon ke baavajuud

ishq ne chheDii na apanii daastaaN kal raat ko 

subah phir laane ko hai lambii judaa_ii kaa payaam 

ye bhii ik aavaaz aa_ii naagahaaN kal raat ko